Kavita ka Bhaar

Shabdon ki upaj, sahitya ki lalak hoon main
Soye hue jag mein dhamakk hoon main

Itihaas ka marmik chhand hoon main
Kalpana komal swachhand hoon main

Darshak aur drishya ka samavesh hoon main
Trast jeevan ka tadapta aavesh hoon main

Satya ke charitra ka chitrankan hoon main
Samaaj ki thekedaari ka laanchhan hoon main

Vichalit mann, tan bechain hoon main
Ashru, muskaan, bolte nain hoon main

Soch ka margdarshak, pehredaar hoon main
Sukh dukh ke anubhav ka satkaar hoon main

Sabhyata ka prachalan, vistaar hoon main
Kavi par kavita ka bhaar hoon main